Alidicarta.it - Testo: 'NU TTE' MMIEZ''E PAZZE

mostra/nascondi twitter degli autori

'NU TTE' MMIEZ''E PAZZE

Scritto da Ermete Ferraro
Categoria altro, genere Scritto il 07/02/2010, pubblicato il 07/02/2010, ultima modifica il 15/02/2010 Letto 184 volte

Commenti (0)

Riconoscimenti

Condividi

Altri testi di Ermete Ferraro

Codice testo: 722010172854

Attendere caricamento dei dati... (reload in caso di blocco)

Nota dell'autore: 'NU TTE' MMIEZ''E PPAZZE

1/4

‘Nce steva ‘na tavula apparicchiata ‘a sott’a ‘n’arbero ‘nnanz’’a casa, e ‘o Lèparo Marzulino e ‘o Cappellaro se stavano piglianno ‘o ttè: ‘mmiez’’a lloro ‘nce steva pure ‘nu Valiéro assaje addubbecato. Isse l’ausavano comme si fosse ‘nu cuscino, appujannoce ‘e gùvete ‘a coppa e parlanno ‘ncopp’’a capa soja. “Me pare scòmmeto assaje p’’o valiéro – penzaje Alice – però, datosi che sta durmenno, me pare ca nun se sta sfasterianno. “
‘A tavula era grossa, però chilli ttrè steveno tutte ‘a ‘nu pizzo, uno ‘ncuollo a ll’ato. “Nun ce stanno puoste! Nun ce stanno puoste!” se mettettero a alluccà ‘nfromme ca verettero c’Alice se faceva annanze. “ ’Nce sta ‘nu sacco ‘e puosto! “ dicette Alice, tutta ‘nquartata, e s’assettaje ‘ncopp’a ‘na pultrona a cap’e tavula.
“Pigliate ‘nu poco ‘e vino “ dicette ‘o Lèparo Marzulino pe’ lle dà curaggio.
Alice se guardaje tuorno tuorno, però nun verette àto ca tè.
“Io nun veco nisciuno vino “ rebbattette Alice.
“Nun ce ne stà “ dicette ‘o Lèparo Marzulino.
“Stanno accussì ‘e ccose, nun si’ stata ggentile a farme st’ufferta “ dicette Alice, ca se steva sturzellanno.
“ E manco tu, ca te si’ assettata senza ca nisciuno t’aveva ‘mmitàta” arrespunnette ‘o Lèparo Marzulino.
“Nun’’o ssapevo ca ‘sta tavula era d’’a vosta – dicette Alice – è apparicchiata p’assaje cchiù ‘e tre perzone.”
“’E capille tuoje abbisognano ‘e ‘nu bellu taglio “ dicette tanno ‘o Cappellaro. ‘A ‘nu poco ‘e tiempo ‘a teneva mente assaje curiùso, e chesta fuje ‘a primma vota ca isso arapette ‘a vocca.
“E tu t’aviss’a ‘mparà a nun te ‘mpiccià ‘e sti ccose - rebbattette Alice, tosta – è ‘na cosa ‘a scrianzate!”
A sti pparole ‘o Cappellaro spaparanzaje tanto d’uocchie, però nun sapette dicere ato ca: “Qua’ differenzia passa ‘mmiézo ‘nu cuòrvo e ‘na scrivania?”
“Bbuono, mo’ ce spassàmmo! – penzaje Alice – Me fa assaje piacere ca pazziammo a ‘nduvinà…
“ Penzo ca saccio arresponnere” se mettette a alluccà.
“Vuo’ dicere ca te crìre ‘e sapé truvà ‘a risposta bbona? “ ll’addemmannaje ‘o Lèparo Marzulino.
“Propeto accussì” dicette Alice.
“Mo’ hê a dicere chello ca vuò dicere “ cuntinuaje ‘o Lèparo Marzulino.
“Certamente – se spicciaje a arresponnere Alice – ammacàro…ammacaro…dico chello ca voglio dicere…ca po’ è ‘a stessa cosa.”
“Manco pe’ niente! – dicette ‘o Cappellaro. “O si nò putisse dicere ca quanno dice ‘Veco chello ca magno’ staje dicenno ‘a stessa cosa ca si dicisse: ‘Magno chello ca veco’ ! “
“Oppure putisse dicere – trasette ‘mmiézo ‘o Lèparo Marzulino - ca dicere: ‘Me piace chello ca tengo’ fosse ‘a stessa cosa ca ‘Tengo chello ca mme piace’! “
“Oppure putisse dicere – se ‘ntricaje ‘o Valiéro, ca pareva ca parlava ‘nzuònno – ca ‘Sciato quanno dormo’ è ‘a stessa cosa ca dicere ‘Dormo quanno sciato’! “
“Chesto pe’ te è ‘a stessa cosa” dicette ‘o Cappellaro, e tanno fernette ‘a cummersazzione, accussì ‘a ggente se stettero zitte pe’ ‘nu minuto, pe’ ttramente c’Alice penzava a tutto chello ca s’allecurdava ‘ncopp’a cuòrve e scrivanie (nun era assaje, ‘a verità).
‘O Cappellaro fuje ‘o primmo ca rumpette ‘o silenzio: “Quante n’avimmo, ogge?” dicette, avutannose â parta’e Alice. Aveva tirato ‘nu rilorgio ‘a for’a sacca e ‘o teneva mente tutto scucciato, scutuliannolo ogne tanto e accustannolo â recchia soja.
Alice ‘nce pensaje ‘nu pucurillo e po’ dicette: “Ce n’avimmo quatto”
“Ddoje jurnate ‘e differenza! – suspiraje ‘o Cappellaro – T’o ddiciette o no ca ‘o burro nun jèva bbuono? “ parlaje ancora, guardanno stuorto ‘o Lèparo Marzulino, tutt’arraggiàto.
“Eva ‘o burro cchiù bbuono ‘e tuttequante “ rispunnette aggarbatamente ‘o Lèparo Marzulino.
“Sì, però ‘nce so’gghiute a fernì arinto pur’’e mullechelle - murmuliaje ‘o Cappellaro – Nun l’aviv’’a sparmà c’’o curtiello d’’o ppane.”
‘O Lèparo Marzulino pigliaje ‘o rilòrgio e ‘o guardaje muscio muscio: po’ ‘o ficcaje arint’’a tazza soja ‘e tè e ‘o guadaje ‘n’ata vota, però nun sapette fa’ niente ‘e meglio c’arrepetere: “Eva ‘o burro ‘cchiù bbuono ‘e tuttequante”.
Alice ‘e steva fittianno ….. ”Quant’è curiùso stu rilòrgio – se n’ascette – Ma comme: dice ‘o juorno d’’o mese e nun dice ll’ora?”
“E pe’ quale mutivo l’avess’’a fa’? – murmuliaje ‘o Cappellaro – ‘O rilorgio d’’o tujo ‘o ddice ll’ anno?”
“No certamente – rispunnette Alice friccicarella – ma chesto però pecché l’anno ce mette ‘nu sacco ‘e tiempo a cagnà.”
“E’ propeto ‘o caso d’’o mio” dicette ‘o Cappellaro.
Alice steva ‘mmiez’’a n’arravuoglio. ‘E pparole d’’o Cappellaro le parevano tutte scombinate, pure si erano state ditte int’a ‘nu bbuono ‘ngrèse, “Nun arrivo a capì bbuono “ dicette cu’ cchiù crianza pussibbele.
“ ‘O Valiéro ha pigliato suonno n’ata vota” dicette’o Cappellaro e ce mettette ‘nu poco ‘e tè vullente ‘ncopp’’o naso.
‘O Valiéro scutuliaje ‘a capa, spacenziato, e po’ dicette, senza manco arapì ll’uocchie: “Certamente, certamente: è propeto chello ca stevo dicenno pur’io”.
“Embé, si’ stata capace ‘e ‘nduvinà?” addemammaje ‘o Cappellaro , arrevutato verzo Alice.
“No, m’arrènno – rispunnette Alice – E qual è ‘a risposta?”
“Nun me passa manco p’’a capa!” dicette ‘o Cappellaro.
“Pur’a mme” dicette ‘o Lèparo Marzulino.
Alice, sfatta, suspiraje. “Pe’ mme, putisseve passà cchiù mmeglio ‘o tiempo vuosto – dicette – ‘mméce d’’o jittà pe ffà ‘nduvenà cierti ccose can nun tèneno risposta.”
“Si tu canuscisse ‘o Tiempo comm’‘o canosco io – dicette ‘o Cappellaro – nun ne parlasse cu’ tutta ‘sta cunferenzia.”

1/4

Home Page
Iscriviti gratis
Iscriviti alla newsletter
Scrivi il tuo testo
I testi segnalati
Richieste di commento
Archivio articoli e notizie
Forum
Cerca

Alidicarta.it on Facebook

Su di noi - Chi siamo - Il nostro progetto - Termini e condizioni di utilizzo - Pubblicità - Riconoscimenti	Strumenti - Collabora con Alidicarta.it - Feed RSS dei testi di Alidicarta.it - Bottone Alidicarta.it per la Google Bar - Alidicarta.it su Facebook - Press kit	Help - Contatta lo staff - Regolamento - Copyright
© 2001-2010 realizzato da Webmantova.com - Layout, grafica e contenuti sono protetti da diritto d'autore - Vietata la riproduzione - PI:02102630205 Link esterni: librogame \| arredamenti mantova \| idee regalo \| codici sconto cashback \| creme viso \| Il portale turistico del Cilento - Hosting www.dominiando.it

Nome:		Pass:
	Segnala la mia presenza in chat \| Password persa?